「傳統的人愛四門車，而年輕一輩則鍾情CityRV，勝在用途多多，賣相又唔老套。RAV4曾幾何時是款好受歡迎的RV車，但繼後就被市場上一眾豪華MPV取代。」
「睇到眼前呢部新RAV4，諗起好多揸車玩法，例如去輕型越野、落大雨遊車河、去龍蝦灣燒烤等，事關新車外形正，車廂同四驅系統都有新設計。」
記者、攝影：陳偉林
ImageGirl：Charlie
「女大會十八變，車款亦一樣，正如眼前呢部豐田RAV4咁，第1代硬直的線條、第2代的圓渾輪廓，想不到第3代新車，賣相會咁成熟。」
新RAV4除一對雙圓的高聚焦車燈教人看得出神外，倒立式梯形鬼面罩一樣咁正，加大碼的車長去到4,395mm，全車一體式大包圍仲有車尾外置後備輪胎，還有高置尾定翼配搭，加上原廠標準裝備的車頂行李架設計，令部車看來不只體形魁梧，仲好有一份男士的剛強味道呢！
「車身的長、闊、高都有改善，新一代RAV4的軸距亦有多70mm伸展，令車廂來得格外闊大及好用。」
個人認為，至難得仲係筆者打開車門所見，前後兩排座椅屬原廠全真皮鑲嵌，出色的剪裁手工給我有妥貼的乘坐感。再者，尾排在遇有需要時，可以左右六四式分割摺平，多出近倍空間使用，筆者仲好欣賞成個中控面板布局，黑襯銀夠High-tech外，音響系統跟冷氣裝置以兩截式立體編排，在三個立體錶板的配襯下，還透現出一種自家的獨特個性。
「坦白講，見部新款RAV4變大咁多，之但係台引擎就未有加大容積，仲係用番2.0公升設計，開頭真係有啲驚唔夠力㗎。」
未試車前我就經已滿腦子疑惑，部車用番2.0公升引擎，邊夠力驅動埋套恒式四驅系統呢？之不過試車只消片刻，疑團便一掃而空，在引擎輸出相若的前提下，部車起跑同加速的感覺卻見活力十足，全沒有半點力不從心，雖然我有點嫌棄只得4前速的自動波箱配搭，但用起來又見順滑，給引擎發揮得淋漓盡致。其次，部車操控亦見平穩，較高車速的轉向亦沒有問題，而新加入的四輪鎖定模式，配合埋上斜用的HAC系統，還有令下坡變得格外安全的DAC裝置，仲帶出部車好高的Off-road本色。
豐田RAV4規格
引擎：1998cc直4DOHCVVT-i
馬力：152ps/6000rpm
扭力：19.8kgm/4000rpm
傳動：4前速自動波
售價：待定
車輛提供：皇冠汽車(28661020)
