世界盃捧邊隊同睇好邊隊，係兩碼子嘅事，唔信？你試問問身邊嘅朋友，好多都會同我一樣，睇好實力超班嘅巴西，但捧就會選擇二線球隊英格蘭，呢個係情意結，我夠膽講句：「10個球迷8個都捧英格蘭！」你可以話我哋冇性格，但英超嘅魔力就算再過10年、20年都依然喺度。死硬派FansEdmond就係一個好例子，英格蘭踢得差咩，鬧完再捧過，次次如是，絕不心灰，還動用成萬蚊買1件英格蘭波衫，乜咁巴閉，咪就係碧咸嗰件落場版波衫，聲稱全球只得3件，為咗佢，仲爭啲同老婆反面！
記者：陸伊琳 攝影：周旭文、楊錦文
碧咸戰衣全球得3件
女人，不要再同世界盃鬥！
每逢世界盃，總會有女人投訴男人冷落嬌妻，外國甚至有報章統計：世界盃期間愛侶做愛次數激減、吵架次數激增……
Edmond比一般男人幸福，佢老婆同樣愛上足球，Edmond三更半夜起身睇波，老婆都樂意奉陪，實在令朋友羨慕。04年尾，Edmond在網上左搭右搭，買入了當年歐洲國家盃英格蘭出戰瑞士時碧咸的戰衣，由於屬球員落場版，全世界得3件，經驗證後件衫堅過石堅，盛惠800英鎊（約$11,000港元），Edmond都話抵，「類似球衣一般要成千英鎊。雖然老婆一向好Support，不過買呢件衫，真係唔敢話畀老婆聽，太誇張喇，一定詐型！」Edmond再三強調唔係為咗幫記者，呢個秘密可以瞞足一世。「為咗你個訪問，我要自首。噚晚膽戰心驚攞件衫畀老婆過過目，佢劈頭問我件衫幾錢，我真係唔夠膽答，叫佢估，點知仲辣㷫咗佢，我不得不就範！」結果點？Edmond勁讚老婆好開通，明白事理，件衫可以保值㗎嘛……
「英格蘭只係二線球隊！」
儲了波衫十幾年，Edmond共有百多件波衫，件件有膠套笠住，寶貝非常，英格蘭及英超球隊波衫佔咗一半以上，其餘係日本隊、皇馬等等，「儲皇馬，主要都係因為碧咸。」Edmond係百分百英格蘭球迷，他直認英格蘭係二線球隊，表現不穩定，又唔夠全面，淨係識得長傳急攻，踢法唔細膩，又唔夠硬淨，「我就唔會睇好佢哋會贏，不過都希望佢哋唔好輸得咁核突，16強就ByeBye。」為咗爭取睇英格蘭出賽，Edmond推遲了旅行大計，「要是6月中去旅行，返嚟分分鐘無機會睇英格蘭，都係暑假先去，貴啲就貴啲。」屎波都要睇，邊睇邊鬧，鬧完又繼續捧，何解？Edmond講出所有英格蘭Fans心聲：「情意結！」
英格蘭熱賣精品
無論英格蘭表現如何，球衣都必定最好賣。352大本營波衫店老闆本身亦係英格蘭球迷，佢表示照以往經驗，英格蘭去貨表現都好好。除了波衫外，與英格蘭相關精品亦有一定市場，好似足球公仔、手帶等等都有好多捧場客。
售賣點：352大本營（27707352）
旺角西洋菜南街38-40號萬高商業大廈9樓
