有當代愛因斯坦之稱嘅英國著名物理學家霍金六月會去科大演講，校園上下都非常開心，但八方聽到佢哋嘅友校中大就好鬼揼心。有科大高層講，最初丘成桐已經成功游說到霍金嚟香港訪問，丘成桐就問校長劉遵義「攞錢」，點知讀經濟出身嘅校長，覺得請佢一個人嚟，要使成幾十萬唔化算。
丘成桐於是就問科大想唔想霍金到訪，物理系出身嘅朱經武校長當然識貨啦，立即願意出幾十萬畀霍金做旅費。
當霍金到訪事件曝光後，科大梗係好雀躍，而中大校長劉遵義見到咁，就覺得走寶，於是就問朱校長可唔可借阿霍金去中大一日，但係俾朱校長拒絕咗！
八方聽到，由於霍金同丘仔最熟，所以今次訪港全程都會由丘仔陪伴左右，而科大為免中大突然出茅招將霍金挾走，將會使出人盯人戰術，派理學院高層去陪霍金。
傳真︰2623-9278
電郵︰[email protected]