小初原本諗住大陸加息，港股呢鋪大件事，但恒指由低開300點至收市僅跌81點，睇落又唔係咁差，而新股大連港（2880）昨日繼續今年新股必勝神話。
除新股外，半新股亦持續強勢，剛於前日公布提升產能的玖龍紙業（2689）係其中之一，其實隻股早排已有多間證券行唱好，目標價7元樓上。在公布提升今年及07年的產能後，證券行即時再加多兩分，如果唔係因為大陸加息影響，噚日表現將更佳。玖龍昨日升1.5％，收6.75元。
另外，早排盛傳會獲美國通用入股，兼批股抽水的中國稀土（769），近日隨大市回落，跌勢頗急。但經紀黃叫小初淡定，佢話揸重貨嘅芬佬不但未驚過，更密密在市場趁低增持。
中國稀土昨最低1.54元，收1.75元，倒升3.55％，相當夠腰力。
慕容小初