內地富起來，講錢唔同人咁品，譬如香港月入三萬嘅人士，大概有三十餘萬，約佔總人口百分之四點幾。睇過一個數字，內地月入三萬人民幣嘅人士，有六七百萬人，相當於整個香港人口，呢個數字似乎幾大，但以十三億人口計，只係佔百分之零點五，比率好細啫，增長空間極大，若果去到香港水平，以4%計，就會有五千二百萬人。三萬銀乘四十萬人等於一百二十億元。三萬元乘五千二百萬人等於一萬五千六百億元，你話鬼子佬投資者會吼邊個市場吖。
投資顧問T啱啱去完上海返嚟，大歎香港人就快冇地企，好彩重有個制度撐住，內地企業與國際投資者搭線，仍要靠大英殖民主義遺留下來嘅一套國際架構，顧問T做咗十五年大陸投資顧問，由教導上面國營企業如何集資，至到為民營企業集資，自覺地位愈來愈低，從一個受人尊敬嘅師傅演變成為一個冇魄力嘅小家子氣人物。點解呢？顧問T話：「我講慣幾億幾億，民營企業老闆聽到好唔耐煩，話要集資二三百億，冇咁嘅deal，唔好搵佢！有人叫我去見一個民企老闆，同佢度吓點樣發大嚟做，搵番三百億。我叫呢位老闆畀啲耐性，向鬼子佬籌集十億八億先，搞好營運紀錄先至更上一層樓，點知佢財大氣粗，冷笑一聲話：我上星期六悶悶地去咗澳門散心，兩日已經輸咗億幾兩億啦，你唔好咁小家至得㗎。我聽完立即請辭，呢類老闆會係日本郵船，但𠵱家唔可以同佢拗頸，以免受辱。」
中國興起，財主佬之多，教外人瞠目結舌，可以比得上中國嘅，只有印度。印度人口將來會多過中國，財主佬又係多到冇譜。顧問T之以前銀行同事，印度人賓架星已經辭職回國搞投資顧問業務。據顧問T引述賓架星所講，印度貪污比中國有過之而無不及，最煩嘅係好多官員只識拿錢不辦事，賄賂之後，好難見到結果，中國人去印度投資，冇盲公竹就死硬。彼此彼此，印度人同樣怕嚟中國投資啫。