王菲下月就會生BB，佢近日都留喺北京準備迎接小生命來臨，但係王菲產前一樣好活躍，佢唔係留喺屋企待產，而係不停打點新屋，又約朋友打麻雀耍樂，最近佢位好友劉嘉玲去咗北京簽約買樓，王菲就趁機約佢敍舊，佢仲搵埋趙薇出嚟，齊齊去咗食勁辣嘅水煮魚。
估計生女
王菲有過生竇靖童嘅經驗，佢當然好了解自己嘅身體狀況，不過其實喺懷孕嗰陣，始終媽咪食乜嘢，腹中塊肉都會吸收媽咪提供嘅養份，換句話說，王菲食勁辣嘅美食，BB一樣跟佢食辣，其實對BB嚟講唔係咁健康。
而為咗迴避傳媒嘅追訪，李亞鵬事先張揚話打算畀王菲喺屋企生BB，佢又話冇叫王菲照過BB嘅性別，但之前就有人見過王菲喺商場買BB仔嘅衫，估佢係生仔，不過馮仁昭就收到料，話阿菲呢胎係女。
