仲有一個月零十日世界盃嚟料，各樣商品、同宣傳攻勢都與世界盃有關，就連最近我去一個酒店搞嘅PressLunch都話要搞搞新意思，只要在場記者估中今屆世界盃冠軍是誰及入球比數，即獎免費入住旗下世界各地嘅酒店數晚，地點任揀，在場議論紛紛，擔心估巴西太過熱好多人中，個獎要同人分，部份人轉估一些冷門嘅球隊，博突圍。我就好想估英格蘭，但始終都落唔到筆，問心嗰句，佢哋比起巴西、阿根廷真係低幾班，我最後估邊隊？都係賣吓關子，留番條路畀的馬後炮！另外，可口可樂亦展開了世界盃攻勢，新一個廣告主題就係「Weallspeakfootball」，點題到極，設計出一系列卡通人物，而呢啲人物亦會在汽水罐上出現，當然有得炒！可口可樂以足球化解世人的仇視敵對關係，故事老套但公仔非常得意，唔怕橋舊，最重要是從中有創意，搞笑嘅一幕幕有丈夫vs奸夫、樹木vs劈柴佬、烏蠅vs烏蠅拍……整個TVC廣告沒有對白，只有伍晃榮的足球評述及德國古典作曲家JohannPachelbel優美嘅音樂，「Weallspeakfootball」做Ending，𠵱家係電視都有得睇！
