英資洋行太古（Swire）兼國泰航空新主席白紀圖噚日約埋八方一班記者食晏，佢見八方後生，就講吓太古嘅掌故，叫大家估吓太古呢個中文名點嚟。
佢話太古洋人大班百幾年前嚟香港開業，諗住入鄉隨俗，改番個中文名，碰啱當時過新年，家家戶戶門口貼住個「大吉」揮春，大班知道係好嘢，於是抄低佢用嚟改名，點知抄錯咗，大字多一點，吉字少一劃，咁就變成「太古」嘞，真係信不信由你。
講到興起，國泰大公關黃家倫又爆料，話較早前俾波音「放飛機」。話說國家主席胡錦濤上周到訪美國波音飛機廠，上咗架整緊嘅飛機參觀，呢架飛機原來係國泰將於今年7月接收嘅第99架飛機。
波音原先講好會即日發相畀國泰，等國泰可以出新聞稿威吓，點知波音臨時甩底，放咗國泰飛機，國泰過咗廟先收到相。
講番白紀圖，佢今年升職升得好及時，事關佢係足球迷，好鍾意睇波，後生時踢開中場，今年適逢世界盃兼升職，即刻有贊助商請佢年中去德國睇決賽，真係開心死佢。雖然佢捧開英國嘅車路士，但心水冠軍係巴西隊。
傳真︰2623-9278
電郵︰[email protected]