一個杜琪峯搞到全城陷入黑社會熱，我支筆無咁Pro，無專業能力寫影評，所以今日請嚟3個導演1個才子先回顧過往港產江湖片，再評《黑社會2之以和為貴》的造型、意識形態同選角各方面，結論是兩讚兩彈。同唔同意唔緊要，最緊要有Noise有Voice，咪Miss呢篇報道呀，盞你入場睇戲無話題搭唔到嗲咋！
記者、攝影：黃藹瑩
陳可辛：無Sell英雄主義！
華Dee與小倩，令我對蠱惑仔與富家女的愛情有着浪漫憧憬，這就是陳可辛導演所說的過份美化吧：「自80年代《英雄本色》開始，香港黑社會開始被電影美化，戲裏面嘅黑社會只係個故事背景，重點放咗喺愛情同義氣，就算90年代的《古惑仔》電影都不忘Sell英雄主義。」至於《黑社會》，他說：「係一套好少有只集中交代黑社會文化同事件嘅電影，震撼血腥場面係就係誇張咗，不過整體嚟講無以前啲戲咁美化黑社會。」
麥兆輝：角色造型貼近現實！
除劇本，演員的服飾造型也是電影成功因素之一。數我最深刻的江湖大佬造型，非《古惑仔》陳浩南的真空皮褸加皮褲莫屬，當年我直頭封伊麵做偶像，𠵱家就見番都想死，麥兆輝導演認為：「80年代Mark哥皮褸造型太受西方電影嘅浪漫主義影響，有啲非現實；到咗90年代嘅《古惑仔》，戲裏面嘅爛仔造型就生活化咗好多，直至到𠵱家嘅《黑社會2》，主要角色着沉色西裝西褲皮鞋，服裝設計貼近現實好多。」
陶傑：少咗份黑社會味！
才子陶傑抱怨《黑社會2》黑社會味道不夠：「相比70年代末嗰啲用黑社會術語做戲名嘅《四二六》、《四二八》，好明顯少咗份真實嘅黑社會味道。80年代係香港黑社會沒落期，過往嘅服飾同手勢都無晒，可能就因為咁令到黑社會電影產生變化。」他認為《無間道》的韓琛最有黑社會味，《黑社會2》令他最印象深刻的反而是戲中的意識形態：「黑社會管治文化同中國管治文化同出一轍，都係行家長式管治，長輩話晒事，絕不能以下犯上。」
李力持：演員翻兜無新鮮感！
李力持導演多拍笑片，他也的確是個百分百笑片Fans：「我都係鍾意引觀眾笑多啲，香港觀眾比較鍾意睇笑片，太深奧或者太多Message嘅電影從來唔係大路戲。」他似乎不太欣賞《黑社會》，着他選歷史經典角色，他寧選陳浩南：「黑社會片種，故事模式嚟嚟去去都差不多，人物造型同角色開始翻兜，選角又返番以前一樣，你之前有無睇過梁家輝同任達華做黑社會片主角先？有吖嘛……內容好血腥好出位？平日我哋身邊發生唔少意外都一樣好血腥啦……所以講真新鮮感真係無乜。」
售賣點：wide&sight
電話：27800599
