張張報紙雞乸大字報道國內加息，又有大公司大抽水行動，加上開市前日股指數唔見3嚿，港股開市前好友打定輸數，今回會捱打得好淒涼。果然，恒指最弊傢伙之時，報銷312點，到埋單，只係唔見81點，期指跌幅更少21點。夠膽喺低位撈貨嘅，即日賺231點。
H指更巴閉，最多跌過232點（3.4%），埋單只係冇咗12點（0.2%）。
個市由低位彈番上去，事後孔明解釋，中國加息冇乜大不了，大隻股抽水又冇乜大不了。做事後孔明，非常容易，可能通街都係。
中移動（941）及中海油（883）兩隻恒指股總共拖低恒指85點，包起晒恒指跌幅有凸。
中移動C輪4451：個市未玩完，當然上上落落難免，唔會一直升或一直跌。中移動係大戶舞上舞落對象，吼低位，買C輪，博反彈。中移動C輪正路對象係4451，8月初夠鐘，輪價55仙，溢價2.8%，槓桿率8.2倍（有效6.1倍），引伸波幅34.6%。想搏殺，則揀2120。
中移動下跌，最熱門P輪4457冇升到，企定喺8.4仙。就算睇正股向下，都咪搞佢，溢價13%，望正股有大跌幅，唔多實際。
中海油C輪2159：中海油因配股而下跌，暫時消化吓，消化過後睇番好。過幾日，若有平貨，執C輪，對象係2159。隻輪7月初到期，輪價47.5仙，溢價3.6%，槓桿率13.2倍（有效8.1倍），引伸波幅35.4%。
章盛