煲呔前幾日拍枱鬧啲銀行界掛住放假打哥芙，唔上去問QDII（合格境內機構投資者）呢項新政策（即係畀啲大陸人買港股同債券），銀行界無啦啦俾煲呔執咗一劑。有間東亞銀行嘅李國寶噚日同啲記者講，佢復活節的確唔喺香港去咗美國，但就唔係放假、亦都冇打哥芙，而係繼續開工！
雖然係煲呔友好，但寶哥哥都忍唔住窒煲呔，佢話𠵱家QDII乜細節都未出，真係做唔到乜嘢，但唔代表佢哋乜都唔做喎！好似東亞咁，一早已經入咗信畀人民銀行同銀監會問QDII啦，唔知煲呔係咪想啲銀行界再勤力啲。
自由黨主席田少雖然唔係銀行家，但係同寶哥哥同一陣線，佢加埋把口話呢個QDII早就有講啦，都唔係呢兩日先至爆出嚟，𠵱家又唔係話規定啲銀行界，廿四粒鐘內整個產品出嚟，煲呔都係想叫啲商界唔好放咁多假啫！
傳真︰2623-9278
電郵︰[email protected]