前日上畫的《黑社會2》，挾住首集千萬票房之勢再戰江湖，片名《以和為貴》仿似道出現今黑社會之狀態。到底《黑社會》有幾真？有幾假？今次我哋一於搵嚟曾公開承認「江湖中人」嘅陳惠敏、李兆基和吳志雄做訪問，一席長談，三位叔父說起當年事時仍不禁眉飛色舞。那些日子，真的令人懷念嗎？可能這就是《黑社會》題材的引人之處。
記者：許維雅
攝影：黃子偉
陳惠敏：第一集真有其事
陳惠敏（陳）
記者（記）
記：點睇《黑社會》呢套電影？
陳：我都有睇第一集，杜琪峯係一個好導演，但佢係跟自己方法同風格去拍，始終唔係太跟足歷史，所以電影始終係電影，點都有少少失實，不過喺氣氛同形象上都包裝得好好。
記：咁你覺得第一集邊個演繹得最好？
陳：任達華做得最好，佢做過咁多江湖片，始終有經驗。古天樂最唔好。而梁家輝就瘋狂得滯，係，黑社會係會有啲咁衝動嘅人，但演繹得太瘋狂喇！
記：其實黑社會第一集真實程度有幾高？係咪真係會搶到龍頭棍就可以做坐館（組織領導人）？
陳：誇張！雖然黑社會第一集嘅故事係真有其事，真係曾經有個社團發生過件咁嘅事，不過拍得太過誇張喇！點會為咗支棍殺咁多人！龍頭棍都係一個象徵，對於一些社團來講係好緊要，不過亦會有人試過搶、試過唔交出嚟，但係要做坐館點都要睇佢夠唔夠實力。
記：咁想做坐館係咪真係要由叔父輩投票？
陳：未必！睇一啲啲組織啦，某啲組織屬於家族組織，只會傳畀個大仔；某啲組織的確由7、8位叔父輩投票。不過其實個個都有機會做坐館，係早做同遲做嘅問題啫！
記：你點睇《黑社會》入面嘅血腥場面？
陳：嘩！戲入面做到太過無法無天喇，過咗火喇！70年代黑社會最百花齊放嘅日子都冇咁狼，做戲都有做啦，以前老一輩嘅差佬比較黑暗，都唔會有咁過火嘅場面。
記：打扮方面係咪真係好似《黑社會》咁個個着晒黑西裝咁有型呢？
陳：唉！扮晒嘢之嘛！個個黑社會都鍾意扮嘢，呢啲門面嘢做咗咪容易搵錢囉！同人傾生意都要着得光鮮啲，人哋先睇得你起。
記：你點睇黑社會？黑社會咁多年嚟有乜改變？
陳：黑社會以前好神聖，97年回歸之後，黑社會壓制得好緊要，警方下下有幾百個卧底喺度，根本已經清楚晒你做乜，邊個活躍唔活躍佢哋都知道晒，你活躍咩，日日捉返嚟差館傾偈。卧底多成咁，你都唔知邊個係，有時有啲人未講做咩乜都搶住叫「我去！」嗰啲咪最易俾人知囉！𠵱家黑社會都變得好商業化，大家齊齊做生意搵錢就算，所以黑社會第二集嘅戲名改得好啱，「以和為貴」，一打大家都死。
李兆基：蠱惑仔似粒湯圓
李兆基（李）
記者（記）
記：點睇《黑社會》呢套電影？
李：我自己冇睇過《黑社會》呢套戲，但我有跟過杜琪峯做嘢，佢係一個心術正嘅人。但要拍黑社會題材嘅電影，其實好麻煩好敏感，黑社會有黑社會嘅原則同歷史，普通人睇就OK囉，以過來人嘅身份睇就會話「有冇搞錯！」不過，黑社會題材嘅戲永遠都可以吸引好多人睇。
記：其實你點睇戲中爭龍頭棍嘅戲，係咪黑社會都好似戲入面咁血腥？
李：龍頭棍只係有人紮職時攞出嚟，棍只不過係一個象徵一件信物，點會無啦啦走去爭，好似警察升職會多粒花，都唔會有人搶粒花返嚟放喺膊頭當升職啦！後生時的確見過唔少血腥場面，唔同組織都有唔同做事方法，坐館進取啲嘅，啲細嘅會狼啲；坐館做事溫和啲嘅，啲細嘅都唔夠膽亂嚟，不過《黑社會》戲入面少用槍都好正常，𠵱家黑社會一響槍就好麻煩，警察會追到你暈。
記：第二集講啲細嘅點上位，其實係咪夠狠就得？同埋會唔會咁有型着黑西裝？
李：黐孖筋！熱死啲蠱惑仔咩！至於𡃁仔上位，好多人覺得無知嘅睇法就係平地一聲雷，咁多人，成條街都話自己係蠱惑仔，突然間可以做到一壇大鑊嘢咪會有人留意你囉！
記：你點睇黑社會類型嘅戲，好似《古惑仔》系列咁，你又覺得有乜分別？
李：我自己當初拍《古惑仔》時，一睇到《古惑仔》本漫畫，即刻反眼大叫「嘩！呢啲咁嘅書真係累到人×家×，不知害死幾多𡃁仔。你留意吓我嘅戲，邊個第一個死，梗係最大嗰個蔣天生第一個死。正如我成日同啲𡃁仔講：想做蠱惑仔咩？你睇吓阿姐點煮湯圓先啦！要上位？咪好似湯圓熟咗咁囉，一升上去就俾阿姐用湯殼一𢳂，就冇咗。我拍《古惑仔》都刻意做到忠奸分明，希望𠵱家啲𡃁仔會明白啦！
記：你點睇黑社會？黑社會咁多年嚟有乜改變？
李：我大膽講句，有黑社會其實係好嘅，唔諗「黑社會」呢三個字，其實只不過係互助社，大家講義氣，有難時互相幫助。不過，𠵱家黑社會已經變晒質，樣樣都利字行頭，吹雞？唔會喇！吹雞搭車着草都係錢，所以好欣賞《黑社會２》嘅片名《以和為貴》，絕對講出現今黑社會嘅情況，全部變成商家，大家搵錢，有乜唔啱一個電話傾掂佢，仲使乜打打殺殺？
吳志雄：吹雞？冇錢搭車喎！
吳志雄（吳）
記者（記）
記：點睇《黑社會》呢套電影？
吳：故事吸引，手法創新，不過有少少誇張失實。同門兄弟咁樣爭上位實在有啲誇張，堂堂話事人梁家輝死咗都可以冇交代。不過我自己拍戲都明白，當電影咁睇囉，好多時電影係冇得解釋咁多。整套《黑社會》都包裝得好好，好似個個着晒黑西裝形象好鮮明，但事實根本好少會咁做。
記：咁多個邊個做得最好？
吳：個個都好，古仔、華仔、家輝都好，特別係家輝，自己本身唔係咁嘅人都做得好傳神。
記：黑社會係咪真係有36誓72例咁多規矩？戲入面似唔似？
吳：（一問之下，志雄已經念念有詞背出）梗係有！以前黑社會好講義氣、好講道義，細細個時都依詩句做人，好似洗腦咁。戲入面係講緊好多年前嘅黑社會，以前叫「洪門」。不過𠵱家嘅黑社會唔同晒喇！
記：點唔同？點睇香港嘅黑社會？
吳：好失望！「錢」字行先，道義冇晒。吹雞？啲細佬一句答埋嚟「冇錢搭車喎！」一人一杯茶都死啦！禍不及妻兒？睇吓𠵱家啲收數佬，爭佢少少錢又淋人哋屋企紅油、又恐嚇人哋老竇老母，唉！以前做嘢，有功就歸阿公，𠵱家啲𡃁仔只係顧自己上位。黑社會根本就係烏合之眾，不過香港嘅黑社會都算斯文，以前年代黑社會好有組織性，𠵱家年輕一代冇組織，一班流氓，10歲8歲又話做大佬。
記：《黑社會》第二集講血腥場面，你自己見過最血腥嘅場面係點？
吳：第二集叫《以和為貴》，聽到好舒服，有咩問題咪溫和啲拆掂佢。所以我都好好奇佢點Sell血腥場面，係一個幾吸引人入場睇嘅地方。我自己就親眼見過有個朋友俾人斬去半邊面，嗰一刻個心真係好痛，好彩我即刻沖水幫佢用手㩒住，後來都救得番。
警察辦 黑社會博物館
個個過咗50歲嘅叔父，無論係唔係社團中人，對現實社團運作有幾深，都好興語重心長咁講兩句：「以前啲黑社會講義氣，𠵱家啲黑社會淨係識搵錢！」想證實現代黑社會係唔係利字當頭，膽正命平唔怕惹事生非嘅可以深夜落旺角，求其捉件蠱惑仔畀兩嚿水叫佢摑身邊兄弟一巴，睇佢制唔制？如果想了解以前黑社會係咪多義氣仔女，就可以去香港警隊博物館，因為裏頭有個三合會展覽室，黑社會歷史、道具服裝都有齊。看圖識字，看字知歷史，安全好多。
香港警隊博物館（28497019）
地址：香港山頂甘道27號
第二集點睇？
