昨日個市，雖然係跌，恒指埋單唔見咗81點，但跌得最急之時，恒指曾大散超過310點，能夠「拗腰」上番去，唔簡單。最犀利嘅就係好淡撼得好激烈，成交大增到570億元，又創政府入市後嘅新高紀錄，市場資金太多，呢個市，千祈唔好睇淡。
大藍籌有追捧，長和最強勢，即使早段市勢急挫之時，長實（001）仍能力保城池，結果以接近全日高位87.35元收市，逆市而大升1.65元。和黃（013）尾段嘅買盤亦好勁，掃高個幾後高收76.10元，升0.55元，有大行睇好和黃，短線會見83元，中線上升目標係95元。
卡森國際（496）收2.40元，升7.5仙，上周宣布業績後，股價由2.70元的高位回落到2.075元先定得住。卡森去年10月上市，宣布業績其實唔錯，股價應聲而落，可視為好消息出貨，但就提供低吸機會，現水平上車，可以3元為獲利目標。
1年目標價3元
卡森主要經營軟體家具及家具皮革產銷業務，05年（12月年結），營業額34.75億元（人民幣．下同），升21.8%；盈利2.65億元，升17.7%，每股基本盈利為41仙，派末期息7.86仙。
軟體家具係主要產品，去年銷售增長35.5%，佔總營業額79.3%，其中布料軟體家具銷售更大增54%；美國係最大市場，去年銷售增長24.4%，佔總營業額68.6%，而致力拓展的歐洲及澳洲市場，增長理想，有33.5%及166.3%，佔總營業額3.4%及5.4%。卡森係中國最大的成品皮革生產商，以縱向一體化運作，在市場競爭中佔有較大優勢。
位於浙江海寧高點沙發工業園區的新廠已大部份投產，廠地係以優惠價購入，可以較低成本擴展產能。今年全部投產後，銷售額可再增加5至10億元。
06年，估計盈利約3.1億元，每股盈利30.5仙（因上市發行新股攤薄），07年可上升至3.4億元，每股盈利33.5仙，以PE9倍計，1年目標價係3元。
瑞銀早前報告估卡森06年可賺3.4億元，太樂觀，目標價3.75元亦太高。
郭兆誠