港府嘅五一勞動節酒會，過去一直喺禮賓府舉行，今年禮賓府做咗煲呔屋企，所以轉移陣地去香港大會堂。酒會請晒左、中、右派工會領袖，睇嚟真係無分彼此咁。但係睇真啲，其實又咪係親疏有別！
因為煲呔致辭完畢之後，就禮貌性地走到台下同一大班工會領袖握手傾偈。之不過，原來佢係有條「路線圖」㗎！握手巡禮嘅首站，梗係左派嘅工聯會啦，少不免要同會長鄭耀棠寒暄幾句，至於成日鬧政府嘅工盟，有工會中人話畀八方知，本來在芸芸眾多工會當中係排第4嘅，唔知點解忽然間俾人打尖，變左排第尾喎！
不過，工盟嘅兄弟姊妹當然唔介意呢啲無聊嘅等級次序，有人話仲好㖭，可以同煲呔有多啲時間講嘢，認真阿Q精神。
傳真︰2623-9278
電郵︰[email protected]