居屋嘅存在價值，一直備受質疑，中記老施更加話過，政府根本唔應該繼續起居屋。好嘞，居屋停售期明年就會完，幾千個單位又再一次蒲出嚟同地產商爭客，但今次代理界嘅反應，係出奇地正面。
中記老施暫時仲未表態，先由3大董事，陳永傑、劉瑛琳同埋阮錫章出馬，佢哋認為今次居屋重售，可以填補市區缺乏一手上車盤嘅供應斷層，牛池灣嘉峰臺，沙田愉翠苑，都會成為焦點，但二手上車盤仍會受壓。至於利記就由何紹章出聲，話居屋客源不同私樓，影響輕微。另一陣營暫時由港置胡日發揹飛，話居屋重要性日降，但強調要快啲公布詳細時間表，減低心理影響。點解佢哋忽然咁熱心呢？
樓市由舊年底開始浮沉不定，班發展商推盤就住就住，唔少銷量只係表面風光，一手居屋定價低私樓一大截，話佢冇吸引力，對私樓冇影響，當笑話聽可能穩陣啲。