「NikeJoga3Futsal三人足球賽2006」首個分站賽事喺上星期日正式開鑼，沙田新城市廣場天幕廣場就成為一眾足球愛好者嘅觀戰場所。當日，4支分別由德國、英格蘭、法國同日本小朋友組成嘅國家隊為爭奪「Joga3Futsal三人足球賽細界盃」進行了首輪循環賽。話明係細界盃當然由細路打啦，每位小朋友年齡平均為12歲左右。當中最好波就係英國隊，成支11人球隊踩場；勢孤力弱嘅係法國隊，只係得4個成員。一較高下之後，賽果都好正路，英國小組第一、德國第二、日本第三，而法國就成為第四。第2站賽事將於5月6、7日（下星期六、日）於將軍澳東港城舉行，屆時亦將分出冠亞誰屬。
當日本地球星范俊業、潘耀焯、沈國強、譚少偉及教練鄭兆聰亦分別自組Honor、Skill及Joy隊進行表演賽，原來本地球星係可以咁好波！值得一提嘅係，范俊業真人原來好鬼靚仔。
記者：羅灝汶
