大成生化（809）被味之素喺美國起訴侵權，消息令股價連續跌咗3日，昨日再跌6.32％，收4.075元，成交股數1659萬股，金額6888萬銀。小初睇見都心驚，但有個別芬佬則認為市場反應過度敏感。
一來係大成話未收到有關起訴文件，所以詳情係點其實未清楚，仲有係大成出口去美國的賴氨酸產品，只係佔營業額1％咁多，點計都唔應該有太大影響。話雖如此，但投資者為求自保走貨先，策略都冇話唔正確。
另外，深圳控股（604）早前獲前瑞銀分析員張化橋加入後，股價好似坐咗直升機。今次深圳國際（152）委任張化橋出任非執行董事，深國股價一樣有得炒，連跌多日後，昨日升8.8％，收0.37元，成交股數增至2.2億股，金額8109萬元。明星效應果然不同凡響。
張化橋出任深國非執董事，獲公司授出一批4000萬股購股權，行使價每股0.376元，同昨日收市0.37元相比，只係差少少就到價。
慕容小初