工廈筍盤唔常見,有醒目投資者見業主肯減價,即時爽快畀票顯誠意,抵佢買到平市價近兩成嘅超筍盤。利嘉閣蔡鳴楚透露,荃灣柴灣角街榮興工業大廈,一個罕有過千呎嘅單位,啱啱以82萬成交,單位1386呎,呎價592蚊,比同類單位低18%。 聽講原業主喺月初開價110萬,見買家睇完即刻還價咁有誠意,於是大幅減價超過25%,以82萬賣出,比98年75萬購入價,只係賺咗7萬蚊。蔡鳴楚話,榮興工業大廈每層有17個單位,過千呎只有4個,一般高過市價,今次造價反而低過市價。