油價近日升創75美元的新高後，略為回軟，後市點睇？應該仲會向好，80美元唔難見，甚至會向100美元大關推進。
油價持續上升，石油公司最受惠，今日講隻中油（香港）（135），股價雖然已升咗好多，但睇油價個勢，中油嘅盈利仲會三級跳，唔怪之得基金、大行同中資盤呢輪都買得咁「行」，中資仲話好有信心會見到8字頭。
基金大戶買盤盛
若果油價係咁升，中油股價見8字頭，真係唔難，即使係較為保守咁推算，中油都好大機會「坐6望7」，家吓升到上5元水平，調整一下，好正常，若再破位而上，就要追進，下一個浪，穩陣咁計，有機會賺到3至4成。
中油收4.80元，往績PE6.3倍，呢個數字，有水份。中油05年（12月年結）無疑係因為油價大升而受惠，營業額33.78億元，升33.3%；勁賺36.44億元，大升374.5%，每股盈利76.16仙，但其中有17億元係收購所產生的一次性負商譽，若唔計此數，每股盈利係40.5仙，升150%。
除17億元負商譽外，去年集團盈利的兩條數，一條係除稅及少數股東權益後之經營溢利12.68億元，升80.7%，另一係合併Caspian份額溢利6.7億元，大升913%。05年，加權平均原油實現油價41.57美元，較04年的28.88美元，升43.94%；毛利率亦由40.3%上升到48.8%。
06年，以全年油價在70美元以上計算，平均實現油價會再大升。今年首季，中海油（883）的平均實現油價為58.13美元（去年為47.31美元），中油平均實現油價估計可升至55美元。
中油06年盈利估計可由去年約20億元上升到35億元（連同增持Caspian權益至15%後的全年貢獻），每股盈利72.5仙，預測PE10倍計，股價已可升越7元。若油價升越80美元，中油股價上升空間會更大。
港股噚日曾升近200點，恒指收16742，升70點，短期仍係在窄幅內上落之局。5月期指16589，大低水153點，主要係有逾20隻大藍籌會除息。大市整固完成後，有力再破位而上，向17500進發。
郭兆誠