投資L本來係賓架，後轉往大公司管理財務，適逢公司高層多數係工業界、航運界、法律界出身，大老闆於是叫投資L負責埋treasury——即係運用公司現金圖利。投資L讀書之時主修物理學，學習啲甚麼股市、期貨走勢技術分析，覺得易過食生菜，一學就上手，加埋金融財經知識，炒貨幣、期貨炒得頭頭是道，為公司增加額外收入，好快就升為董事。九七前幾年，大量專業人士/高級白領移民，投資L亦不例外，去到外國，得閒過頭，於是執起鑊鏟炒期貨，亦搵到啖食。
眨眼間過咗十零年，投資L仔大女大各自飛，於是鳥倦知還，返嚟香港，請佢嘅租客搬走，收番層舊居。唉吔，乜屋邨內啲樹木唔見咗咁多嘅，問清楚，係業主立案法團之上手執委會議決斬樹嘅，因為樹老生蟲，管理成本甚高，斬咗啲樹，大家方便咁講。投資L向鄰居打聽，原來斬樹帶來嚴重後果，斬樹前冇政府OK，漁農署發出通知，要罰款，每斬一樹罰六萬元，自不然係要由業主立案法團向眾業主徵收啦，投資L問清楚，好似斬咗將近一百棵樹，罰款接近六百萬元，投資L為之彈起，因為呢筆錢要由業主攤分㗎嘛。唔畀又唔得噃，佢睇見《蘋果》報道佐敦渡船角文苑樓釘契事件，搞到嗰個田地，就有排煩咯。
我哋知道投資L畀得起，笑佢：「你炒一炒就搵番啦，幾百伙人家，每伙賠萬零兩萬啫！」投資L久居外國，知道香港移民起大屋，嫌屋地內大樹成為頂心杉，會一斬了之，引起當地人不滿，指責香港人冇環保及環境意識。估唔到返到嚟香港，立即碰上斬樹問題。
呢啲都係小事啫，最緊要香港有活水，炒家搵銀容易。投資L素來睇好期貨，回來之前平晒倉，見黃金升到飛起，大歎走寶，點知上星期四晚金價失驚無神跌咗二十幾美元一安士，投資L立即飛撲入市，到前幾日星期一平倉，佢話賺咗呢筆錢有排使，可以安安定定吼過另一次機會。