馮仁昭四圍超：黎明、樂基兒上海3層窗簾防偷拍

黎明同樂基兒早排俾某周刊偷拍到佢哋喺屋企嘅親熱行為，雖然黎明冇正式出嚟回應過呢件事，但係由佢嘅行為，就知道佢非常之介意呢單嘢。最近黎明同劉若英、范冰冰喺上海拍內地電影《心中有鬼》，樂基兒為咗陪愛郎，早排上咗上海，咁當然係同黎明住埋一齊啦，咁耐都冇畀記者偷拍到，因為黎明一早已經有晒警覺，不過日前就影到佢一個人出現。

見過鬼怕黑

黎明住喺陝西南路1間酒店式公寓，佢自己包咗1層樓嘅3間房1個月，連同劇組部份工作人員，成層樓8間房都包晒，佢嗰層樓保安特別嚴密，雖然有香港狗仔隊上咗去住埋同1間酒店，但根本上唔到黎明住嗰層嘅單位，見過鬼怕黑嘅黎明為免由窗口影入單位嘅情況再次發生，佢住嘅酒店房長期拉咗3層窗簾，而且黎明仲反偷拍，搵人影低晒入住狗仔隊嘅相，等身邊所有人都分到邊啲係狗仔隊。