獨立屋通常大賣矜貴，尤其山頂傳統豪宅地段，恃住供應少，就似皇帝女咁，唔憂賣又唔急賣，甚至吊高嚟賣。好似新地施勳道既獨立屋新盤倚巒，成廿二幢，都搞咗好多宣傳，早排新地代理執董雷霆話，要等第三季先賣，噚日就講，因為近排有唔少賓架查詢，市場對呢類月租成25萬至30萬元大屋需求大，所以諗緊將部份大屋改為收租。
唔知係咪舊年雷霆負責賣嘅尖沙嘴凱旋門，刷新豪宅史上3萬蚊一呎紀錄，自信心爆棚，噚日佢誇下海口話，倚巒出租洋房，目標呎租係80至100蚊，拍住中環甲級寫字樓個價。
睇番過往山頂租金，最高呎租都係白加道2號間4000呎大屋，曾經創下每呎70蚊租金新高，今番倚巒租金想挑戰新高，又想喺豪宅史上破紀錄乎？
打唔打破到，仲要拭目以待。過往，都有唔少出租物業曾經將租金推向高位，好似中環嘅服務式住宅四季滙咁，呎租就突破過一百蚊。四季滙兩個頂層連天台單位，舊年底以破豪宅及商廈租金紀錄，以全包方式，平均呎租115蚊，租畀兩家跨國企業行政總裁，呎租凌駕山頂豪宅。
電郵地址：[email protected]
