恒指升70點，5月期指只升36點。中海油（883）停牌涉先舊後新配股，第日復牌可能會拖低恒指幾十點，所以期指預先反應，冇恒指升得咁多。炒恒指C輪，參考期指作用多過參考恒指。
過埋今日，就到5月份。每逢轉月份，C輪溢價通常都縮得快啲，但踏入新月份，情況可能又會好啲。有平C輪，執番啲。
和黃C輪4762：和黃（013）本周一受賣家當消息刺激上升之後，連跌3日，昨跌0.85元，收75.55元，幾乎返到上周五75.25元。
和黃跌得差不多，賣家當始終係好消息。開始買啲C輪，正路之選係4762，11月尾到期，輪價60仙，溢價5.5%，槓桿率12.6倍（有效7.4倍），引伸波幅23.1%。3620條件同4762差唔多，揀呢隻落手亦得。
想搏殺啲，向2211埋手，隻輪6月尾到期，輪價29仙，溢價1.8%，槓桿率26.1倍（有效14.7倍），引伸波幅20.6%。賭呢隻，贏輸都放大啲。
華創C輪3431：華創（291）陰陰哋再上，收16.35元，升0.25元。月中曾見17.75元高價，重攀高價有機會，吼低位買C輪3431。隻輪5月尾到期，輪價47.5仙，負溢價2.5%，槓桿率3.4倍。負溢價係因為隻輪到期前除息，股息0.25元相等於股價1.5%，隻輪實際仍有輕微負溢價。
章盛