今時今日我哋特區，最支持通過相等於經濟23條立法嘅「反壟斷法」有三個人，佢哋就係DavidWebb、陸恭蕙同湯家驊。咁今日，孫柏文一定要讚吓港交所388嘅股東，皆因佢哋有無比政治智慧，選DavidWebb同陸恭蕙做董事。因為港交所嘅股東，好醒咁聽晒六十年代花旗國總統詹森（LyndonJohnson）嘅說話，佢曾經講過：「Itisbettertohavehiminsidethetentpissingoutthanoutsidethetentpissingin。」大約可以繙譯為：「寧願他帳下向外屙尿，莫要他站外尿向帳屙。」
咁講係因為港交所最基本嘅競爭優勢，就係特區政府所賜嘅壟斷權。𠵱家DavidWebb同陸恭蕙都做咗董事，咁佢哋一定要全力維護港交所股東嘅利益，點樣可以再追求啲無謂嘅原則同理想呢？唔好話「反壟斷法」啦，就連證券交易呢一行，佢哋都唔想港交所面對競爭。就算有「反壟斷法」，DavidWebb同陸恭蕙都會好似其他政府授權壟斷行業嘅既得利益者一樣，用大把理由去爭取豁免。簡直變咗港交所壟斷嘅守護神！
我諗如果有一日，政府話為了提高特區金融業競爭力，開放交易所行業競爭，從返郭伯偉做財政司年代，交易所行業百花齊放嘅局面，大家就會係webb-site.com睇到幾百個理由反對，仲要因DavidWebb有好高嘅IQ，所以睇到嘅理由都會有紋有路。唔知到時大家會唔會，喺交易廣場對出嘅行人天橋上面，見到DavidWebb同陸恭蕙好似啲區議員咁，掛啲篤眼篤鼻嘅街板，大大隻字話：「成功爭取港交所繼續壟斷！」
大家可能會問：「就算交易所行業開放競爭，港交所咁大，成交量又咁多，地位穩如泰山，邊度有可能新搞嘅交易所可以同佢鬥？」大家唔使驚，一定有得鬥，一定益街坊，我隻金手指就幫大家篤個例子出嚟。花旗國今時今日最大嘅認股證交易所，InternationalSecuritiesExchange（國際證券交易所），都只不過6年前成立。始創人成立國證交所嘅原因，係因為當時佢見到花旗國細戶，炒認股證嘅費用昂貴，又被大戶「蝦」，所以成立新嘅交易所。國證交冇政府維護，成功都係靠一個一個客戶咁攞番嚟。橫掂港交所一向以嚟都覺得炒認股證係賭博，就不如畀新嘅交易所同港交所競爭。
孫柏文