今年初，港交所新交易大堂正式啓用，但其實仲有部份未完工，噚日，新交易大堂餘下部份（圖一）連同展覽館正式開幕，上次由財政司司長唐英年揭幕，今年就邀得特首曾蔭權主持開幕禮。會上，曾特首大讚港交所主席李業廣，話佢對本港金融業嘅發展作出無私貢獻，如果冇咗李業廣，相信港交所做唔到今日嘅成績。
李業廣亦惺惺相惜，大讚當日當奴嘅果斷同堅決行動，打退大鱷。之後，當奴走咗一轉參觀大堂，喺金魚缸度同大家打招呼（圖二）
噚日新開幕嘅展覽館，市民可以入場參觀，但要畀錢，每位10至20元，裏面介紹港交所歷史同佢哋提供嘅服務。另外又整咗個會議室，方便啲上市公司喺度舉行會議，亦要畀錢，每兩小時盛惠2000蚊。
梁鑑章攝