立法會噚日辯論器官捐贈問題，負責答辯嘅周一嶽局長好坦白咁話，已經向家人表明，死後想捐贈器官，身體力行支持吓，佢仲話政府計劃設立資料庫，記錄晒所有願意捐贈器官人士嘅資料，希望增加捐增者數目；最後喺各大黨支持下，立法會通過動議，促請政府全面檢討現時捐贈器官政策。
喺一眾立法會議員中，肥仔明都算快人一步，好早已經填咗張器官捐贈卡；當時佢填嘅聯絡電話，仲只得7個數字㗎咋，咁就知有幾耐歷史啦。問肥仔明最想捐啲乜？原來係個肺，點解？佢話因為自己俾人頂得少，個肺好清㗎喎。
不過，肺，明明係唔可以移植嘅器官嚟㗎噃，所以肥仔明要諗過另一樣嘢捐，咁係乜呢？肥仔明諗一諗就話要捐個心，事關佢心地好喎，唔知各位有無異議呢？
傳真︰2623-9278
電郵︰[email protected]