聽聞舖王鄧成波噚日買咗件上環地鐵站附近嘅大單邊舖位，位於永樂街87號泰達大廈1至10號舖，大約2000呎，唔知係咪想食住基金入市概念，最近麥格里連環巨注買維德廣場同新紀元廣場低座兩幢商廈，話唔定第日將上環打造成另一金融區，引入質素更高嘅租客，附近嘅舖就自然水漲船高。
呢排舖有唔少租客，包括便利店同雜貨店等，如果約滿打通晒租畀大租客，租金可望有更大增長。
中原戴錦輝話，深水埗順寧道裕成大廈地下A、B舖，1920呎，有個投資者出870萬連租約買入，4531元一呎，現租客係茶餐廳，月租4.5萬，回報率6厘。
同區青山道231號地舖，約一千呎連閣樓600呎，另一投資者以520萬連租約買入，每呎3250元，現時由家品店以每月2.28萬租用，回報率亦逾5厘。