Wherewereyouguys?

「Wherewereyouguys?」肯定喺金融界成為最熱嘅口頭禪，特首曾蔭權唔單止係出色嘅推銷員，仲做埋思想指導員，噚日佢擔任銀行公會處女講座嘉賓，可能競逐連任嘅障礙大致清除，佢嘅表現可以用「亢奮激昂」嚟形容。
佢講到復活節長假期間，人行突然亮起QDII綠燈，班賓卡可能仲掛住「喺泰國打golf同做spa」，唔識得把握商機，去「敲」周小川同劉明康道門，失諸交臂，竟然復活節蛇王。講到呢度，特首肉緊到敲晒枱咁問，「Wherewereyouguys？Wherewereyou？」
有高人指點華華，原本特首講稿中並無呢段，但食飯時主家席嘅任總講到人行周五公布QDII出台，周日就出埋申請細則，佢用咗幾日時間先啃完章則；唔知係咪特首聽完任總一席話，上台後同一眾賓卡開個玩笑。
好似已故財爺郭伯偉話齋，講做生意，官員同政客唔會叻得過市場人士。獅子銀行嘅大中華經濟師梁兆基就犀利啦，發問前即自爆幫銀行「鬥」咗份QDII報告，惹來全場笑聲。