華華噚日先講完九巴陳祖澤減薪三成，跟手就見到佢老哥，咁就梗係要問候吓佢啦！陳祖澤扁晒嘴咁話，無法啦，生意淡薄，啲油係咁升，份人工咪俾啲油搾亁，做大嘅就梗係減得最多啦！
管理層減人工之外，華華仲八到單巴士趣聞，話說九巴83年嗰陣已經開晒口，想將全港第一部雙層巴士DaimlerA（圖）捐出嚟，擺喺博物館畀公眾參觀，點知博物館一直冇位，結果到23年後今日，架巴士依然停喺沙田車場。
唔好睇少呢架巴士，1949年引入香港時，成條彌敦道嘅招牌都要吊高，馬路兩旁樹木都要修剪遷就佢嘅高度。既然搵唔到好人家，九巴決定自己留番個女喺身邊，想睇架巴士就要等每年一度傑出車長嘉年華會，或者以團體形式參觀車場喇！