偶像歌手幾乎每次出席公開場合，總有大批fans在場為之吶喊打氣，薛凱琪（Fiona）昨日出席公開活動時，就有1名獨行男fans不斷高呼她的中文名，嗌得聲嘶力竭兼走音，舉止騎呢，令Fiona尷尬得頻頻儍笑。
薛凱琪昨日在銅鑼灣時代廣場出席1間影音店開幕活動，現場有1位10多歲的年輕男fans在圍欄外不斷高喊薛凱琪的中文名字，還擘大喉嚨大叫，落力非常，叫到聲音沙啞。只聽得他三番四次大聲問Fiona：「你記唔記得我呀？」令在場人士為之側目，連Fiona也尷尬得不住儍笑。
否認與師弟拍拖
雖然該名男fans為了Fiona嗌破喉嚨，但原來他並不只有Fiona1個偶像，據知他更曾在官恩娜的公開活動上現身支持，不過Fiona覺得沒有所謂，還說：「佢鍾意官恩娜冇所謂，只要支持正版就得。我冇畀佢嚇親，佢咁做都係想親近偶像啫！」
此外，本年初本報報道Fiona與師弟方大同相約逛商場兼打情罵俏，日前又有報道指兩人秘密拍拖半年，對此Fiona沒好氣地說：「我同女仔出街就話我同女嘅，同男仔出街就話我同男仔拍拖，咁我唔可以唔出街㗎嘛！我又冇做錯嘢，咪放開懷抱囉。總之我唔會搞姊弟戀，佢細我3年，仲係唔肉唔酒嘅人，我哋係唔會發展嘅！可能外邊啲人太想我拍拖，但連我自己都唔心急。」
採訪：魯萍
攝影：陳順禎
