九倉舊年有六位獨立非執董，每人年薪5萬大元，其中四人身兼審核委員會委員，只係加多1.5萬，一共6.5萬元，攤開十二個月計，月薪5400，同酒樓洗碗阿嬸差唔多，真陰功。
而且九倉出糧非常君真，陳茂波04年9月底做獨立非執董，九倉嗰年就計番三個月糧畀佢，即係9000大元，嗰年每個獨立非執董嘅年薪只有三萬五。華華估計，佢哋同主席吳光正交情一定好好，唔係點會咁少人工都制吖。
華華翻查其他藍籌公司嘅年報，發現大部份獨立非執董一年都有十幾萬。至於吳光正同九倉副主席吳天海，梗係𢭃最多人工啦，吳光正去年有1572萬，吳天海就有1109萬，兩人嘅人工比04年分別增加25及19%。吳光正果然數口精明。