昔日冇人吼嘅工廈物業，𠵱家升格為皇帝女，大把人想要，租售市道真係可以用「火熱」嚟形容。細碼貨多人炒賣，摸上摸個案都唔少；大面積單位一樣好搶手。
先講租務，中原新界工商部助理營業董事張志傑話，元朗中運汽車大廈一個2.15萬呎地廠，俾物流公司以每月12.9萬承租3年，呎租6蚊，但比起上手租客嘅呎租4蚊，足足升咗五成。
張志傑補充話，屯門福田大廈二期地廠招租，都係兩萬呎左右，叫租每呎又係6蚊，竟然有3個租客洽租，當然唔少得穩膽嘅物流公司啦。由於市場上呢類逾萬呎大碼貨愈嚟愈少，所以業主可以慢慢揀個條件最好嘅租客至扑槌。呢個租值喺同區嚟講，都算合理。張志傑相信，工廈租金仲有好多上升空間。
講吓買賣，大圍順景工業大廈高層B室，面積14514方呎，連私家車位同貨車位各一，以968萬易手，呎價667蚊。利嘉閣測量師行工商部經理朱亮恒話，幢工廈喺81年落成，得7層高，每層31368方呎，樓底高16呎，地下可以畀貨櫃車直入，適合物流同航空公司租用。而呢個價錢又係屬於低水，即係話仲有得炒啦。
電郵地址：[email protected]