古天樂、張家輝和王天林、王晶父子等前晚出席《黑社會以和為貴》首映時齊齊呻病，古仔自爆鉀偏低和膽固醇偏高，醫生建議他多食蕉少吃肉。王天林則透露早前因心臟有事而要入院治療。
杜琪峯導演的電影《黑社會以和為貴》今日公映，前晚在中環IFC戲院舉行首映禮，該片主要演員任達華、林家棟、古天樂和王天林等齊齊撐場。
王天林早前因為心臟出了問題，入院治療了一段時間，剛剛出院返家休養，前晚他在兒子王晶陪同下出席首映禮，天林叔說：「近期因為唔係咁舒服，都冇開工，多數留喺屋企休息。」
膽固醇高鉀偏低
至於一身黑西裝的古仔則說：「今日我同爹哋、媽咪嘅驗身報告出咗嘞，成家人嘅鉀都偏低，醫生建議我哋要多食蕉同奇異果嚟攝取鉀，如果鉀唔夠，個人經常會覺得四肢無力，成日覺得攰，再嚴重啲會危害生命。」
古仔一家人每隔半年便會做一次身體檢查，上次做檢查時，他們一家的身體沒問題，但今次卻驗出問題，古仔說：「我嘅鉀偏低外，膽固醇又偏高咗，醫生話要注意飲食，最好少食肉多食菜，我連近期嘅飲食餐單都有畀醫生過目。」
安志杰常發噩夢
至於安志杰在拍攝《黑》片一場被古仔綑綁四肢，然後將他放置在一個放有鉛的麻包內再掉入水中，導演特別在水底準備了蛙人，拍畢此鏡頭後，蛙人即救他上岸。但自拍完這場戲後，安志杰經常發噩夢，其母提議他看心理醫生，安志杰說：「拍嗰陣，真冇諗到會咁驚，𠵱家都係靠心理醫生幫我消除恐懼。」在旁的張家輝也嚷着要看心理醫生，他歎氣說：「導演剪晒我啲戲，唔知係咪我做得唔好呢？我真係擔心到要睇心理醫生。」
採訪：魯萍、張俊銘
攝影：陳順禎
