周一先度完假返港嘅煲呔特首，晏晝去銀行公會破天荒搞嘅午餐會，同賓卡食飯兼做主講嘉賓。可能放完假叉足電，佢一上台就幽王冬勝一默，話冬冬應該係想請格林斯潘嚟講嘢，只係搵唔到先搵佢，跟住又教訓吓班賓卡放工唔好淨係掛住打golf。
身為公會主席嘅王冬勝，同埋煲呔忠實支持者東亞李國寶，全程做左右護法傍實BT，一眾重磅賓卡，中銀和廣北、渣打蘇利民、恒生柯清輝、花旗陳子政咁，全部陪坐陪食，再加埋金管局任總，齋係呢半圍主家席都夠晒份量！
華華收到風，話呢餐飯共三十一圍，每位科水至少五嚿，坐得愈近權力核心就愈貴！咁邊啲人坐喺核心附近呢？任總個副手韋柏康、地鐵周松崗、鷹君羅嘉瑞等，後輩就有小賭王何猷龍、李民橋、合和胡文新，以及信和黃志祥大公子黃永光。而李國寶同和廣北密密傾（圖），唔知係講QDII，定係約埋去打波呢？