新任新聞處處長邱騰華返工只係3日，噚日就已經約齊成班行家見面，先嚟個同傳媒打交道嘅熱身。由教育統籌局調過嚟嘅邱騰華形容，自己仲係新仔，仲好似喺五里霧中，好多嘢要學。又話會用「爽」字去形容新工，因為答行家問題、搵料要夠爽快喎！希望佢將來可以貫徹呢個「爽」字啦！
喺行家中少不了成報，但係《成報》無糧出，八方問新處長會唔會介入調停吓、幫吓手，新處長笑笑口話，請佢地食咖喱就無問題，因為新聞處請行家午宴次次都少不了咖喱呢道菜。
邱騰華由教統局調過嚟，之前專責搞資歷架構。佢講笑話之前份工有實質政策要推銷，但新聞處份工就無一件具體事項要推銷。咁又係，之不過，將來就可能有唔少拆彈工作要做。八方問佢嘅前老細李國章有無歡送佢，佢笑笑口話自己就請咗李國章食咗餐飯，話係「尊師重道」，留番個好印象畀人。
傳真︰2623-9278
電郵︰[email protected]