警監會外洩投訴人資料，搞到人心惶惶，有受影響人士好想更換身份證號碼，以免夜長夢多。不過有好怕麻煩嘅人同八方講，咪以為換咗身份證號碼就可以一了百了，換咗個號碼之後，反而會增加唔少意想不到嘅麻煩。因為有唔少嘢都要用身份證號碼做紀錄，例如買賣樓宇、車牌、結婚證書等，都有你嘅身份證號碼，一旦換咗，可能令你賣唔到樓、換唔成車，總之就好唔方便喎。
不過政府都唔係未試過幫人換身份證號碼，除咗政府卧底外，唯一一次應該係幾年前，有位仁兄好大頭蝦，唔見幾次身份證，之後耐唔耐就收到告票。雖然冒認佢嘅人只係犯啲只收告票嘅小罪，但不時要上庭同個官解釋犯事者唔係自己都幾煩，結果長痛不如短痛，在兩害取其輕下，嗰位大頭蝦決定更換身份證號碼，重新做人。
傳真︰2623-9278
電郵︰[email protected]