上市公司開股東大會，雖則係例行公事，但時不時都會有趣聞發生，好似噚日恒生咁，就有位唔肯透露自己姓乜名乜嘅資深小股東，公開話要加柯清輝嘅袍金，唔係華華親耳所聞，仲以為有人老作。
事緣噚日恒生開股東大會，其中一項議程，係將董事長邵銘高，同埋一眾董事嘅袍金增加，惟獨副董事長柯清輝冇得加，有個小股東即時代抱不平，話點解人人有得加，淨係柯大俠冇呢？佢又話唔止要加，仲應該加一成。
資深小股東
柯清輝話，加袍金係由佢提出，如果佢都加埋一份，咪有利益衝突囉！柯大俠雖則係咁講，但有小股東撐自己，佢都開心到不得了，開完會仲即時同阿伯握手嗲咗兩句。講番個無名阿伯，原來係資深小股東，佢同恒生唔少高層都鬼咁好傾，但就畀檸檬華華食。
李華華
讀者如有任何意見或報料，歡迎發送電郵至[email protected]。