衞蘭（Janice）和衞詩（Jill）兩姊妹近日被傳為爭寵而不和，不過前晚兩人懶理是非，以孖妹造型接拍廣告搵銀，她們在記者面前高調手拖手晒親情，但Janice卻坦言最怕妹妹不聽教，似有弦外之音。
今年新人衞詩挾胞姊衞蘭（Janice）之名勇闖樂壇，兩姊妹不時被人拿來作比較，Jill日前直認因緊張而有脫髮危機，近日又有周刊指黎明（Leon）偏心Janice，令兩姊妹不和。雖然Janice和Jill兩姊妹近日受到是非困擾，但前晚她們孖住接拍麥當勞的新一輯電視廣告，更在傳媒面前手拖手，力證姊妹情不變。
鏡頭前夠放
前晚Janice和Jill到鰂魚涌拍攝廣告，兩人在鏡頭前做出各種鬼馬動作，而一向表情多多的Janice就不忘發揮其古靈精怪的本色，在鏡頭前伸脷單眼，而受甩髮困擾而要戴帽遮額的Jill則表現較拘謹。
事後兩人接受訪問時就異口同聲否認不和的傳聞，Jill說：「雖然我哋係孖生，但有時都會鬧交，總之嬲一陣就冇事，由細到大我哋感情都好好，有時仲會心靈相通講埋同一個字㖭。」
而Janice亦即時力撐胞妹說：「所有同事Leon都錫，唔會話錫邊個多啲，而且Jill係我妹妹，自己一定錫佢。」
至於Janice被指對妹妹受甩髮困擾漠不關心，Janice即時為Jill按摩減壓，以行動來否認傳聞，Janice說：「唔係大家諗咁嚴重，我成日開導佢叫佢唔好咁緊張，亦都有將自己經歷教佢，只係最怕佢唔聽。」Jill聽到Janice之言後即時強調自己十分聽話。
此外，未知是否受傳聞影響，前日Jill完成電台訪問後，身邊的工作人員即時加碼至4人，Jill更由4名助手陪同下離開電台。
刻意遮額頭
而拍廣告前，Jill和Janice先到中環整頭髮，不過頭戴帽子的Jill為免光脫脫額頭曝光，不時以手遮住額頭位置，而Janice和Jill發現記者後亦即時高調手拖手，任影唔嬲，避免又再被指不和。
採訪、攝影：卓寶花、娛樂突發組
