前日大陸宏調消息一出，搞到紅籌、國企風聲鶴唳，但到噚日方案公開，大市又即刻升番。
經紀黃話，除咗阿爺現時點名的行業要睇實外，一啲未點名的行業仍要小心，好似熱炒咗成年的大陸地產股，因為升幅巨大，慎防有大幅回吐。
以富力地產（2777）為例，跌完一輪後，昨日一度回升至41.75元，但隨即沽壓湧現，最後收39元，升幅大幅收窄至1.83％，所以都係小心為上。
經紀黃又話，剛剛發完15億元可換股債券的恒安國際（1044），係仍可以吸納的內需股之一，恒安近期並無受到宏調或大市波動影響，投資者信心十足。恒安今次集資15億銀，估計大部份用作取代現有銀行貸款，慳番唔少利息支出，其餘款項則會因應大陸紙巾需求增加而擴產，點計都有着數。
恒安批債券的換股價喺19元樓上，有咁高溢價，短中期都唔怕因股價上升被兌換成股票沽貨。恒安昨日升4％，收13.20元。
慕容小初