今日期指結算，期指高水6點冇乜啓示。市場錢多，有人造上搵食，有人造落搵食，個市唔會雷打不動，郁吓三兩百點變動唔出奇。先搵落後股，再揀相關C輪埋手，搵食之道。
長實C輪9871：長實（001）收85.65元，唔見1.10元。現價較上周五和黃（013）宣布賣家當好消息前88.05元，跌咗2.40元，即係暫時對和黃賣嘢未有作出利好反應。又由周一最高價90.20元起計，長實已跌4.55元。跌得差不多，係時候趁低收集C輪，等一兩個星期後收割。
長實C輪正路之選係9871，6月上旬到期，輪價53仙，負溢價0.6%，槓桿率16.2倍（有效12.7倍），引伸波幅20.3%。呢隻唔係最熱嘅C輪，4878同9813最熱，但溢價唔低，除非認為長實會忽然大升，否則博唔過。正股只要牛皮，揸呢兩隻輪就會輸錢。
中銀C輪3590：中銀（2388）收15.95元，升0.10元，係6日以來第1日回升。年初至今，恒指升12.1%，中銀升得7.1%，有權追落後。而且，控股股東中行上市腳步聲愈來愈近，觀乎近期新股上市好賣過出爐蛋撻，中行上市點都會帶旺中銀。
買些少中銀C輪擺落個倉，3590唔錯，10月中夠鐘，輪價74仙，溢價4.2%，槓桿率21.6倍（有效9.7倍），引伸波幅23%。壽命長，唔怕蝕溢價。
章盛