豪宅市道好，代理佣金都水漲船高。美聯徐志強講，薄扶林貝沙灣今個月以嚟有17宗成交，係今年以來該屋苑最多二手買賣嘅月份，比起3月份嘅14宗多咗兩成幾。
利嘉閣湯博文話，最近成交嘅貝沙灣（圖）三期3座中層A單位，2432呎，連車位，2130萬成交，每呎8758蚊。原業主04年5月以2067萬買入，持貨約兩年，賺63萬。聽聞，今個月貝沙灣嘅二手買賣，淨係佣金都過300萬。
傳統豪宅地段嘅西半山，一樣有用家捧場。中原地產李淑賢透露，旭龢道8號秀麗閣高層A單位，2334呎，用家以1880萬買入，呎價8055。
香港置業宏惠強就話，紅磡海名軒2座低層A單位，2139呎，連租約，由印度籍珠寶商人以1800萬買入，每呎8415蚊。都好好價。