孫柏文相信，冇乜嘢喺股民心目中恐怖得過「宏觀調控」呢四隻字。花旗國都有做宏調，不過恐怖程度比起祖國政府嘅宏調，簡直係蚊髀同牛髀。恐怖原因好簡單，因為大家都完全觸摸唔到祖國政府會做啲乜嘢去「調控」，淨係04年，差唔多四月尾呢個時間，祖國政府落命令，叫大陸銀行一個禮拜之內完全唔可以放債。話借錢炒樓唔得，借錢起廠又唔得，甚至阿媽要做手術都唔畀借。大家諗吓，如果花旗國政府叫聯邦儲備局，落同一個命令畀啲花旗國銀行，仲唔天下大亂？大家驚嘅唔係淨係一個禮拜冇債放咁簡單，而係今次話一個禮拜冇錢借，咁下次咪一個月冇錢借都得？
我諗我始終唔理解祖國政府嗰種「堤在人在」嘅做事態度，每一次黃河氾濫，河堤崩潰在即，如果畀我哋特區又或者花旗國政府，第一件事就係將所有人帶去安全嘅地方，不過祖國政府就會擺兩個解放軍士兵喺個河堤度，大大聲話「堤在人在」。咁如果「堤不在」呢？咁「人都不在」囉！完全唔理性。香港人唔係驚祖國政府想做壞事，不過最驚就係非常好心去做非常壞事。例如今次話要「宏觀調控」，係點樣決定話要做呢？係唔係有人食完飯，發覺冇乜嘢搞，就搵啲嘢嚟搞呢？日本同花旗國淨係加個短息，都閒閒地畀一年半載通知，祖國政府嘅「宏觀調控」，通知又冇，點「調」又唔講，唉…希望祖國政府今次「宏觀調控」科學少少。
8400萬票當選
「…陸恭蕙得超過8400萬票，成功當選…」嘩！一聽到仲以為自己發緊夢，咁嘅票數，前灣仔區立法局代表陸恭蕙，一定係當選國家領導人，就算唔係國家層面，都起碼當選成為四川省省長。花旗國牛仔總統04年都係得六千幾萬票，陸恭蕙得超過8400萬票，仲唔勁？不過孫柏文後尾發現，原來係港交所（388）選舉董事嘅席位，有人話今次陸恭蕙當選，可以同DavidWebb一齊，將小股民嘅影響力加大一倍。雖然我一聽到，隻金手指就即刻想去篤爆呢個謬論，不過我係唔會怪嗰啲講呢個謬論嘅人。因為佢哋只係俾殖民政府荼毒咗，以為喺六十個議席嘅立法局裏面，直選產生嘅議席由五席變成二十五席，就等如立法局民主咗五倍。一個立法機關，如果直選產生嘅議席連一半都冇，就連理論上都根本冇可能話事，選唔選都罷。
今次陸恭蕙成功擊敗新濠國際（200）嘅何猷龍，其實我係覺得有啲可惜，因為佢可以成功當選，咁就代表港交所嘅股東面對現實，承認港交所係一隻不折不扣嘅「豪賭」概念股。不過，政府醒目，知道董事局可能會冇何猷龍，所以就先知先覺咁搵咗夏佳理，港交所呢間賭場當然最好有個管開同類業務嘅人做主席。
咁都講得出
最後講起立法機關，我就提吓立法會議員李卓人，佢諗到條橋，話勞、資同政府一齊供款，攞原來嘅強積金供款中抽取5%，擺入「全民退休保障計劃」。白癡程度高到連我都啞口無言。大家都係睇《利字當頭》一欄總舵主利世民兄同我喺電話度批李卓人嘅二十四字真言啦︰「劫貧濟（製）貧，賊佬抽水，中產被脅，再次被劫，愈劫愈貧，愈貧愈劫！」
孫柏文