日前汪阿姐發火問點解西九嘅委員會名單連一個粵劇界代表都冇，講真呢個問題唔可以唔問，政府又冇可能唔答。如果政府話劉千石代表咗粵劇界咁就真係笑話，所以政府只能支吾以對。
冇幾耐之前香港電台《視播縱橫》直播有關西九嘅討論，嘉賓係民政事務局嘅馮先生。八和會館嘅陳劍聲阿聲姐一開頭就已經質問過點解冇粵劇界代表。馮先生有回應但係冇回答，講咗等於冇講嗰隻。聲姐想再追問，不過搶唔到支咪，睇嚟都幾勞氣。
所以汪阿姐又要出馬發炮。冇幾耐之前阿姐佢已經打過去商台要何志平為粵劇界做啲嘢，解決新光戲院同埋高山劇場嘅問題。我哋親愛嘅何局長照例一律𠵱𠵱哦哦。上次答唔到阿姐嘅問題，今次仲連一個代表都冇。唔止連一個代表都冇，份名單好明顯就係好傾斜，某啲背景嘅人多好多。阿何局長，咁係唔係「西九俱樂部，閒人免進」呀。
𠵱家唔嘈就冇着數
點解一個代表都冇？政府怕乜呀？
有個粵劇人同我講：「鬼咩，粵劇界好多山頭㗎，你畀得呢個，嗰個嘈；畀得嗰個，呢個嘈。大家都咁高咁大，點解你可以代表我呀？政府唔想麻煩啫。」
我又唔係咁睇。
粵劇界近年要求嘅無非係：
一、政府要重視粵劇；
二、要求有一個理想嘅粵劇劇場。
我見過聲姐經常出沒諮詢會，講嘅都係呢啲嘢，而政府嘅反應係冇反應。上列兩點要求，唔理你有幾多山頭（有人就有山頭，除非你住喺荒島）都係要做嘅。
其他界別冇山頭咩？有山頭唔緊要，但係唔好搞山頭。汪阿姐、阿聲姐，冇粵劇界人入委員會仲好呀，點解呀？大家名正言順咁睇實班委員會囉，有唔啱嘅咪嘈囉。
「你哋係唔係想瓜分西九呀？！」
呢個就係你哋要問嘅問題。
以前係：得西九，得天下；𠵱家係：分西九，分天下！（地產商在內）。
各位粵劇界朋友，香港已經變咗係一個唔嘈冇jetso嘅世界。曾特首最怕就係嘈，連任首要就係冇人嘈。
嘈喇。嘈就喺添馬艦起個中心畀你，唔嘈呢就永世屈喺高山劇場。
西九？好細啫。
觀火
傳真︰2623-9278
電郵︰[email protected]