雖然柯清輝（圖）已經係恒生嘅人，但原來恒生出畀佢嘅董事袍金，佢唔可以袋落袋。聽聞出糧畀佢嘅仍然係「香港上海滙豐銀行」，而根據滙豐銀行嘅規矩，高級管理人員擔任滙豐銀行以外其他公司嘅董事，收取的董事袍金一律要上繳。
因此，柯清輝兼任五家公司嘅董事，包括滙豐、恒生、國泰、思捷環球、和黃，每年收到嘅董事袍金，只有滙豐嗰份可以落袋，其餘都要交番畀公司；據柯大俠講，滙豐嘅角度係話佢用公司時間出去開會，因此要上繳。
同樣都係打銀行工，大新嘅賓卡就好得多，舊年盈利跌成五成，個別高層嘅年終花紅都有成800萬元，該行年報亦首次披露董事總經理黃漢興原來薪酬一直最高，佢喺05年的總薪酬高達1456萬，包括613萬元薪津、以及800萬元花紅，黃漢興04年時嘅總薪酬更高達1990萬元，雖然舊年已經減咗，但仍係銀行界的打工皇帝。