香港地唔少長者都有幾隻「誠哥系」股票，就連佢兩位公子嗰啲都捧場。錢，曾幾何時係賺過嘅，但今時今日，超人三父子仲係唔係財神呢？
華華噚日響SUNDAY個股東會又見到一堆呢類精靈公公婆婆，大家圍埋一齊自然又係宣洩對首富一家嘅怨氣。先講首富，有個伯伯話，當年好多人都係見超人個人老實、生意又做得唔錯，所以買佢啲股票（即係長實同和黃），之後諗住佢兩個仔唔會差得去邊，就落埋叠（即係買長江生命科技同8號仔）點不知……！
私有SUNDAY唔容易
對於大少澤鉅，有個婆婆話，到𠵱家都唔知佢搞乜賣乜，又唔見佢派息，開股東會淨係畀埋一袋二袋唔知係咩嘅藥，打死佢哋都唔會拎！咁大少供股囉喎，佢哋梗唔制啦。
二少呢？講嚟講去都係怪二少鯨吞老電之後做唔到嘢，婆婆話，相信要等到自己個孫或者曾孫大個仔，8號仔先會返到位，總之二少大把錢應該當做善事派多啲息畀老人家。
至於SUNDAY，班長者話係當年IPO三個七銀錢申請，二千股由七千幾銀跌至得番千幾蚊兼從未收過息。本來唔關二少事，鬼叫佢買咗，咪入佢數囉，總之若果二少仲想私有化SUNDAY，至少要出IPO價一半（即係個八）先有得傾！