香港總商會噚晚喺洲際酒店一口氣開記者會、會員大會兼酒會，以及有煲呔主禮嘅晚宴，涉及賓客人數超過五百人，就算唔講賓客，齋睇自己友嘅名單，都已經夠晒份量，好似小超李澤鉅、中電包立賢、安永胡定旭、永泰鄭維志、地鐵周松崗、中銀和廣北、九倉吳天海、萬泰田北俊、震雄蔣麗莉、蘭桂坊之父盛智文等，場面不知幾咁熱鬧。
雖然人多，但講到最搶鏡，始終離唔開四個大男人，邊幾個？咪就係艾爾敦、翁以登、方志偉，加埋就快做第四任老竇，去到邊都咁多人跟住嘅小超李澤鉅囉。小超雖則只係出席會員大會，一到場就同陳永棋匿埋一邊吱吱噚，好鬼秘密，反而吸引咗大家嘅注意力喎，認真高招。
翁以登又點解咁搶鏡？睇怕都唔使華華多講，事關佢過幾日就去上海賣咖啡，噚日可以話係臨別秋波，除咗有主席艾爾敦對佢高度讚揚之外，逢人見到佢，都會同佢嗲多兩嘴同SayGoodbye，兼且佢身為主人家，成晚忙到氹氹轉。
各師各法
至於艾爾敦，由記者會開始，佢一直撐足咁多場，場場都係主角，發言機會最多，又有成班董事撐佢，成功冧庄做多一年主席，幾乎張張相都有佢份，你話邊個夠佢搶呀？
相比起以上兩位同事，新任總裁方志偉就以退為進，除咗喺會員大會亮一亮相，同翁、艾二人影咗張合照之外，就一直神龍見首不見尾，直到晚宴開場，先再見佢出現，跟住煲呔嘅大隊入場，咁難見到佢，一現身就梗要影多幾張相，咁咪又搶晒鏡囉！
李華華
讀者如有任何意見或報料，歡迎發送電郵至[email protected]。
