泛民主派合力搶攻選舉委員會成績初見，達仔噚日同八方講，自從民主黨宣布，話要同公民黨合作鼓動更多人參加選委會選舉後，都唔知有幾多飛來蜢打畀佢，話要幫手，尤其話要幫佢哋喺各個業界搵候選人，呢啲熱誠真係前所未見，所以達仔都相信，今次選委會選舉，會多咗平時唔多現身嘅民主派冷門人出嚟跑吓㗎，好有信心喺今次選舉中，能夠自動當選嘅界別代表肯定大減。
公民黨嘅湯大狀就好似無達仔咁樂觀，佢話有唔少專業人士同佢講，泛民要進佔一以團體票為主嘅界別，例如金融界呢啲同大陸關係密切嘅界別，真係一啲都唔容易；就算業內人士有心幫佢宣傳，都未必有成績，只能逐啲逐啲咁醞釀吓。
仲有呀，湯大狀話有幾個界別，都搵啲中間人撼泛民主派，所以呢場仗真係好難打。當然最有信心都係自己嗰瓣，即係法律界，相信知名度愈高嘅人，勝出機會一定愈高。
爆料熱線：29290000、27860099
報料傳真：26239278
報料電郵：[email protected]