來自日本埼玉縣的皮革品牌RedMoon，成立日子不算長，在香港知名度不算高，只知它是一個堅持全人手製作的皮革牌子，以設計印第安風格的皮包著名。可能你會問：全人手製作有何稀奇？無錯，不少皮具名牌都以Handmade見稱，但RedMoon創立至今，每件產品由小至一條皮繩，大至一件皮褸，仍然堅持只由一位工匠獨力完成，堅拒流水作業式的大規模生產，就算因此令公司規模難以擴張，依然無怨無悔，這不叫固執，叫甚麼？
記者：吳小明
攝影：黃子偉
皮王現身
RedMoon的創辦人後藤惠一郎，今勻親率旗下6位員工及工匠來港獻技，並即席親手製作皮具單品。對於品牌不僅堅持全人手製作，還要是「一手製作」，完全無分工；後藤謂這樣才能確保每位工匠的技術全面，而且每年都會定期兩次落舖搞展示會，可以讓客人直接向工匠反映番用家意見，確保產品更切合顧客的需要。
「LV爭咗啲！」
品牌成立至今13年，當初為何創立？「就是因為市面上完全搵唔到啱心水嘅皮具品牌，以前用開LV，但硬係覺得爭啲，於是咪唯有自己嚟！」亦因為後藤愛皮成迷，「至今我都堅持以皮具為主，其他周邊產品，一定要加上真皮部份，好似Patch上皮塊嘅牛仔褲同帽。（吓？咁條牛仔褲咪唔可以洗？）我哋嘅皮牛仔褲經過化學處理，塊皮係可以機洗㗎，唔使擔心。」厲害！
堅持原皮唔玩殘舊
RedMoon的品牌特色，還在於喜愛以原色皮革製作，就算有染色產品，都很少會作大量裂紋或洗刷處理；對於近年新興的裂皮或VintageLeather，後藤：「皮革同牛仔褲一樣，都是自己着舊用舊先靚，專登買啲事先整殘整舊嘅皮包嚟用，就無咗嗰份經過年月洗禮的陳舊味道。正如我們嘅牛仔褲，都堅持全部都是Unwashed，等用家自己穿出破舊感，這才是個人風格及魅力所在。」
印第安風情畫
RedMoon走美式印第安民族風格，作品有大量印第安頭像圓鐵鈕、穗穗及羽毛裝飾，不過為了讓品牌走向國際市場，已陸續新添其他設計元素，如蛇皮、馬尾毛等ExoticLeather的運用等等。
RedMoon仝人騷哥利
荒井隆仁（28歲）
工匠（加入5年）
荒井主力做銀包及皮帶，枱面上的黑色綴圓鐵牌銀包（$2,940）就是其作品。頭4年都只是學師階段，近一年才晉升至可以獨力做銀包等小型產品。
長岡靖（30歲）
工匠（加入5年）
長岡主力做銀包，更擁有整條ProductLine，如這款花形明線長銀包，就是由長岡自己設計及製造，已發展成一個系列。這部衣車已有60年歷史，亦專跟他一人。
坂本博幸（31歲）
營業企劃部部長（加入6年）
RedMoon的機構文化是大部份員工都要由低做起，就算如坂本般已升到管理階層，都一樣識做袋做衫，如圖中這件恤衫就是其作品。$1,850
東條浩行（28歲）
廣報部部長（加入7年）
東條做了兩年工匠已調升至廣報部，他腰繫的皮帶就是自己的設計
浦囗勢子（38歲）
PinkPlanet事業課課長（加入6年）
PinkPlanet是RedMoon的女裝線，勢子是這線的設計師，她手拎的電話套正是自家作品。$1,180
川津貴德（28歲）
營業本部營業課（加入2年）
川津負責銷售部門，身兼售貨及舖面管理，他亦是今次隨團來港唯一一位唔識做袋嘅RedMoon員工。
Shoplist：Take5（23758262）
尖沙嘴加連威老道41號A1/FB&C室