胡錦濤到布殊母校耶魯演講，一啲都唔奇，自一九八八年起，美國白宮主人都喺耶魯讀過書，假如下一任總統會係克林頓夫人希拉莉嘅話，耶魯人就會掌管美國近四分一個世紀，為近代世界一項罕有紀錄。
有線電視上星期五晚直播胡錦濤演講，左丁山每逢星期五晚上，就會疲乏不堪，撐住隻眼聽夾睇，卒之頂唔順，覺得胡主席講來講去，了無新意，瞓着咗。第二朝起身問老友，胡主席之後講成點，佢哋話：「氣氛沉悶，如果要評分，同喬治布殊在耶魯攞到嘅GPA（四年成績平均分）差唔多。」
唔通自己聽錯，錯到離晒譜？星期日睇報紙，報道說：胡錦濤耶魯演講，幽默風趣，一名外籍耶魯學生甚至要給胡錦濤的演說打一百分的滿分！左丁山真係IQ有啲問題，完全唔明白人哋點解有咁涇渭鮮明嘅意見。
勿論胡錦濤嘅耶魯演講是否精彩動人，佢點都冇辦法釋除中美關係嘅最大難處。除咗最基本嘅政治制度矛盾之外，美國政府最唔滿意中國政府喺外交政策方面，採取「道德中立」（morallyneutral）嘅立場，為咗做生意及採購石油，總之來者不拒，一於同蘇丹、緬甸、莫三鼻給、伊朗等國家老友鬼鬼，理得呢啲國家內部政策如何吖；所以布殊在白宮歡迎胡錦濤之時，特登提咗一句：在達福（蘇丹城市）嘅「種族滅殺」，而胡主席一於當聽唔到！美國國務院現在猛推動中國在國際社會做一個responsiblestakeholder（負責任的利益攸關者，香港譯做持分者），點樣算至負責任呀？根據美國人嘅立場，咪係反恐，反壓制人權，反種族滅殺，反核武擴散等等囉，但中國從來唔理呢啲事務，五十六年來嘅外交原則就係「和平共處」，「不干涉外國國內事務」，換言之，就係「各家自掃門前雪」，你唔搞我，我唔搞你，你儘管閂埋門打仔教仔，與我無關，你打完可以繼續同我做生意。呢套中國思維，在美國眼中，就唔係「負責任的利益攸關者」咯。