物以罕為貴，葵涌華景山莊獨一無二嘅複式，吸引買家追價70萬購入，平均呎價超過4000蚊，雖然比普通單位高一成，買家依然話抵買。
中原華景山莊分行經理李世強話，華景山莊基本上係無複式嘅，今次買家睇中嗰間中層C室上、下兩伙，係原業主申請入則自製嘅，淨係條樓梯嘅建築費已經要20萬，加上由申請至批則到起好樓梯，足足花咗超過半年時間，好少業主會咁做，正正係矜貴之處。
買家原本預算買800萬嘅物業，呢個複式超支70萬，不過買家睇完之後，覺得物有所值，於是翻睇兼追價70萬，以870萬成交，合共2158呎，平均呎價4032。
原業主分別喺01同04年以321萬同326萬買入上述單位，之後花時間金錢入則加建樓梯，𠵱家轉手，升值近三成半。